Y cam nesaf yw digwyddiad asesu gyda phrofion seicometrig cyn y digwyddiad ei hun. Cewch eich asesu yn ôl galluoedd penodedig yn unig a fyddwch chi ddim yn cystadlu yn erbyn ymgeiswyr eraill sy'n dod i'r digwyddiad asesu gyda chi.

Y cam terfynol fydd cyfweliad gyda'r busnes perthnasol, ac, a bwrw bod popeth yn mynd yn dda, byddwn wedyn yn cyflwyno cynnig ichi ymuno â rhaglen raddedigion Arriva.

Isod fe welwch nifer o awgrymiadau a chynghorion i'ch helpu i wneud y gorau o'ch cais.

Pethau i'w gwneud ymlaen llaw

• Edrychwch ar ein gwefan gorfforaethol a'n safle dysgu a datblygu.
• Siaradwch ag Ymgynghorwyr Gyrfa, aelodau teulu, cyfeillion a thiwtoriaid i gael cyngor.
• Meddyliwch am beth a wyddoch am eich diwydiant a pham y byddech yn hoffi gyrfa ym myd cludiant gydag Arriva.
• Darllenwch y wasg fasnach a chylchgronau perthnasol fel y gallwch lunio barn.

Awgrymiadau a chynghorion

• Byddwn yn cysylltu â chi'n bennaf drwy e-bost, felly rhowch inni gyfeiriad a ddefnyddiwch yn rheolaidd.
• Wrth gysylltu â ni, defnyddiwch iaith glir. Purion yw defnyddio talfyriadau ar gyfer negesau testun sydyn at gyfeillion, ond yn ystod y broses ymgeisio byddwch yn ddiamwys, yn groyw ac yn fanwl-gywir.
• Defnyddiwch wiriwr sillafu ar gyfer popeth a wnewch.

Llenwi'r ffurflen

• Byddem yn hoffi ichi wneud cais ar-lein. Gallwch gadw'ch gwaith a dod yn ôl iddo, felly does dim rhaid ichi lenwi'r ffurflen gyfan ar yr untro. Nid dyfalbarhad y ceisiwn ei brofi!
• Meddyliwch am eich ateb i bob cwestiwn, a'i gynllunio. Gwnewch yn siŵr eich bod yn cwblhau pob adran o'r ffurflen, gan ei gwirio'n ofalus.
• Cofiwch gadw copi ichi'ch hun. Os cewch wahoddiad i ddod i ddigwyddiad asesu, bydd angen ichi wybod beth a ddywedsoch.
• Mae gennym ddiddordeb ym mhopeth a wnaethoch lle'r ydych yn falch ohono. Felly peidiwch ag esgeuluso'ch cyraeddiadau anacademaidd.
• Ceisiwch bob amser ddarparu enghreifftiau i ategu'ch honiadau.

Ar y diwrnod

• Darllenwch y cyngor yma a gwnewch yn siŵr eich bod wedi paratoi'n drwyadl.
• Gwiriwch yr amser, y dyddiad a'r gyrchfan eto.
• Os na allwch ddod, rhowch wybod inni. Hwyrach y bydd modd inni aildrefnu.
• Meddyliwch am rai cwestiynau y carech, efallai, eu gofyn yn ystod y dydd.
• Cofiwch: rydym wedi'ch gwahodd oherwydd ein bod am gael cwrdd â chi, nid i'ch baglu. Byddwch yn naturiol.

Un peth arall_

• Nid rhywbeth i boeni yn ei gylch yw'r profion seicometrig cyn y digwyddiad asesu. Byddwn yn anfon gwybodaeth bellach i egluro'n fwy, gydag adrannau ymarfer. Does dim atebion cywir nac anghywir, felly atebwch yn onest. Fe ddefnyddiwn y canlyniadau fel gwybodaeth gefndir i'r digwyddiad asesu ac mae cwblhau'r drefn ymlaen llaw yn gwneud yr holl broses ychydig yn fyrrach.